'ळ' अक्षराची
गंमत
-------------------------------------
पळणार कसे
वळणार कसे
तंबाखू मळणार कसे
दुसऱ्यावर जळणार कसे
भजी तळणार कशी
सौंदर्यावर भाळणार कसे
पोरं-टोरं तळयात-मळ्यात खेळणार कशी
तीळगूळ कसा खाणार ?
टाळे कसे लावणार ?
बाळाला वाळे कसे घालणार
खुळखुळा कसा देणार
घडयाळ नाही तर
सकाळी डोळे कसे उघडणार ?
घडयाळ बंद पडले तर पळ कोण मोजणार
वेळ पाळणार कशी ?
मने जुळणार कशी ?
खिळे कोण ठोकणार ?
तळे भरणार कसे ?
नदी सागरला मिळणार कशी ?
मनातली जखम भळाभळा वाहणार कशी
हिवाळा,उन्हाळा, पावसाळा
नाही उन्हाच्या झळा
नाही त्या निळ्या आभाळातून पागोळ्या खळाखळा !
कळी कशी खुलणार ?
गालाला खळी कशी पडणार ?
फळा, शाळा मैत्रिणीच्या
गळ्यात गळा
सगळे सारखे, कोण निराळा?
दिवाळी, होळी सणाचे काय ?
कडबोळी,पुरणपोळी
ओवाळणी पण नाही ?
तुम्हीकाय चिंचपोकळीला रहाता ?
भोळा सांब ,
सावळा राम
जपमाळ नसेल तर
कु ठून रामनाम ?
मातीची ढेकळे नांगरणार कोण?
ढवळे पवळे बैल जोततील कोण?
पन्हाळ्याची थंड हवा खाणार कोण ?
निळे आकाश,
पिवळा चाफा
माळ्याच्या कष्टाने फळा- फुलांनी बहरलेला मळा !
नारळ, केळ, जांभूळ, आवळा,
नवऱ्याला बावळट बोलणार कसे
काळा कावळा,
पांढरा बगळा
ओवळ्या बकुळीचा गजरा माळावा कसा
अळी मिळी गुपिचळी,
बसेल कशी दांतखिळी?
नाही भेळ,
नाही मिसळ
नाही जळजळ
नाही मळमळ
नाही तारुण्याची सळसळ
पोळ्या लाटल्या जाणार नाहीत
टाळ्या आता वाजणार नाहीत !
जुळी तीळी होणार नाहीत !
बाळंतिवडे बनणार नाहीत !
तळमळ कळकळ वाटणार नाही !
काळजी कसलीच उरणार नाही !
पाठबळ कु णाचे मिळणार नाही
सगळेच बळ निघून जाईल,